Приказни од Македонија (1)

За да не го запустам блогов во текот на летото (додека ништо не се случува во ГУЦ), решив да ви раскажувам приказни за Македонија. Секако во нив има многу субјективизам, но не можам да избегам од него. Јас ја сакам МОЈАТА МАКЕДОНИЈА и таа љубов ќе биде претставена тука.
Првата приказна се вика:

СУДБИНА

Ѕевс - Илиј - Сонцето - Свети Илија - Илинден

Ѕевс (Зевс, Зеус) познат како врховен бог во грчката митологија всушност е врховниот бог на древните народи од Балканот.
Неговото име може да го поврземе со македонскиот збор ѕе – ѕиркање, што често го употребуваме кога си играме со малите дечиња. Така и богот Ѕе ѕиркал од небото и си поигрувал со луѓето.
Тој уште се среќева и како Деус (ден – сонце) или Деус патер (божји татко).
Познат е како громовник (кога ќе се налути пушта громови од небото).


Многу често во разни ликовни творби Ѕевс го гледаме во кочија со четири коња.

Богот Ѕевс бил врховен бог близок до Сонцето.

Во најстарите записи од Македонија забележуваме дека зборот ИЛИЈ (ИЛ, ИЉ, ИЉУ) означува СОНЦЕ. Сонцето кај древните Македонци го симболизира бог.
Вербата во Сонцето е забележлива и присутна во сите древномакедонски симболи а тие опстојуваат до денес.

Во Библијата пророкот Илија се појавува во 9. в.п.н.е. (токму во времето на поистоветувањето на Ѕевс со Илиј (Сонцето).

Исус го споменува Илија кога се наоѓа на крстот, а оние што го гледале мислеле дека го вика на помош (Зарем не е ова повикување на бог?). Потоа Илија се појавува и на денот на Исусовото воскреснување.
Многу интересно е тоа што на иконите Св.Илија го гледаме во речиси идентична позиција како Ѕевс - во кочија со четири коња. (Оваа фотографија е од српска црква и не е толку карактеристична, но во Музејот на Македонија има една икона на која не можете да препознаете за кого станува збор, дали за Ѕевс или за Илија - но за жал забрането е да се фотографира).

Св.Илија е исто така познат како громовник.

Зарем не ви личи дека ова е иста личност, само во друго време и друга религија?

И, ќе си речете каква врска има сето ова со Македонија?

Епа, има! Кој е најважниот и најпочитуваниот празник во Македонија - и верски и државен? Се разбира Илинден! Тој се празнува на 2.Август.

А токму на 2. август се случувале најзначајните настани за Македонија (и во древноста и во поблиската историја).

Токму на 2.август се случила битката кај Херонеја кога Филип и Александар Македонски ги згазиле нашите јужни соседи!

Токму на 2. август се кренало Илинденското востание!

Токму на 2. август се случило заседанието на АСНОМ кога е прогласена Македонската Република (1944), а на 2. август следната година македонскиот јазик е прогласен за официјален!

И што е ова? Зарем не е судбина?